63

الشعب المصري بقى عازم

يِكسر بعد العسكر قُلَّة

ويجيب رَيِّس، مدني لازم

شكراً للفنجري والمُلا

عوَّا ، برادعي ، مِنعم ، حازم

إنشالله الرَّيِّس زعبولا

...

62

إترشَّح مع إنُّه فلول

دايرتنا كِرهوه علطول

راح جَاب لحمة وجزَّار بارع

علشان تتوَزَّع في الشارع

قام الصُّبح لَقاها اتسرَقِت

ماتبَقَّاش غير كيلو " كوارع "

...

61

تِستَغفِلنا ؟ .. بيتهيَّألَك

لو فكَّرت فـ مصر بعقلك

هَتلاقي سِرها مكشوف

والخايِن دايماً معروف

لو فاهم غير كده عن مصر

يبقى انت اللي بجد خروف !!

...

مش هنتخبك يا فلول

مش هنتخبك يا فلول
وانا عـ الكلمة دي مسئول
إحنا امَّا عملنا الثورة
حرَّرنا قلوب وعقول
..
الأصوات ليك هَتقِل
عارفينك مش هَتحِل
الشعب هَيفضل صاحي
والفِل هيفضل فِل
..
لو جيتلي تاني البيت
بتوزَّع رُز وزيت
هَفتح اقولَّك متشكر
أنا يا حبيبي اتغديت
..
أنا عُمري ما هَبقى ناسيك
للظالم كُنت شريك
لمَّا احنا دُقنا المُر
كلتوها حمام بفريك
..
اللي اعتاد التزوير
وحَكَمنا بالجنازير
كَسَّرنا بعديه قُلَّة
ووراك هنكَسَّر زِير
..
وبتوب الثورة اتغطَّى
هتخِيل على مين دي يا بطة
الناس كلها عارفينك
لو حتى تكون زلبطة
..
أي خيانة لثورتنا
دي هتحصل على جثتنا
لو مستنينا ننام
جُوَّة التحرير فَرشِتنا
..
مصر بتتغير يابا
بعد ما حكموها عصابة
بقى فيها شجاعة وقوة
زي ما كان فيها طيابة
...
مش هنتخبك يا فلول

فلسطين

إحنا كل المصريين
إيد واحدة ويَّا فلسطين
واللي يمس ترابها تاني
عمرنا ما هنفضل ساكتين

غزة والضفة الغربية
خان يونس نابلِس وجنين
زي الجيزة واسكندرية
أسوان سينا وقنا وشبين

كل أراضيكي أراضينا
إوعي تقولي ان احنا نسينا
واحنا اللي عشقناكي سنين

حقك مـ اللي آذوكي علينا
بكرة هنحميكي بعنينا
اللي ما بينّا دم ودين

رايحين عـ القدس وناويين
في الأقصى نصلي ملايين
راجعين يا فلسطين من تاني
نكتب إسم صلاح الدين

في قصيدة "الحارة" من مؤتمر حزب "الحرية والعدالة" بالجيزة

60

فيكي يا مصر 3 أسرار

بسهولة يجيبها الشُطَّار

إنّ حاميكي كان حراميكي

وانّ الإعلام دا بيعميكي

وانّ زعيم "المصري اليوم" ..ـ

كان شغال فــ مجلة ميكي

...

الحارة

أغنية يا شهيد .. كلماتي

أغنية التعديلات .. كلماتي

من سداسياتي في الميدان