40

سَهم البورصة شافُه سويسري

مَع أمريكي وصيني ومصري

واحد تَاه فـ بنوكُه ولاص

واحد قال فلِّست خلاص

واحد حَس بمكسَب شعبُه

والرابع زَي البلاص

...

39

كان مصري لكن مش حَافي

خاطِب ومُرتَّبُه مش كافي

حكومتنا قالِتلُه انسى الأزمة

هَتجيب عَفش وشاشة بلازمَا

اقعُد بس وغمَّض واحلَم

غَمَّض، سَرقِت مِنُّه الجزمة

...

38

قالُّه لِيك شَقة يا مواطن

قام فـ خيالُه وعقلُه الباطن

قال حاسس إنِّي اتهَنّيت

وأخيراً هَتْلَمّ فـ بيت

قالُّه دِه شَقة فول يا حمار

قال طيب ؛ كتَّرلي الزيت

...

37

كان صحفي وعايِز يِتْكافئ

بقى دايماً يكدِب وينافِق

ويحُطّ مع العسل السِّم

ويسبّ الإخوان وينِمّ

كان عَندُه امبارح مُوتوسِيكل

بقى دلوقتي معاه " بِي إم "

...

36

حكومتنا حكومة أخلاق

لِيها المَصريين عُشَّاق

شفافية وحُرية ودِين

حَق وحُب وعدل ولِين

أخلاق فعلاً لِيها وجود

زَي وجود بنزين 80 (!!)

...

35

عِشت فـ مصر بدون إحباط

شُفت جميع المُتناقْضات

شُفت القلب الطيِّب آسِي ،

شُفت الفُرقُعلوز الراسِي ،

شُفت اللي خَرَب بيت أهالينا

جاي بيقُلَّك عفو رئاسي

...

34

إحتار الحِزب المِغوَار

يعمِل رَمز يكُونلُه شعار

قُلت مَادَام سُمعتكوا نضيفة

وسِيرتكُم طاهرة وشريفة

و"نظيف" كان رَيِّس حكومتكوا

خَللُّوا الرَّمز بتاعكوا "اللِيفة"

...