69

عُمر بلادي ما تكون غابة

مهما بتكبر فيها الأزمة

واحنا ان كُنت شايفنا غَلابة

إوعى تفكَّر مالناش لازمة

واللي بيحكم بالدبابة

لازم ياخُد يوم بالجزمة

...

68

الناس مهما يعَدِّي زمان

فاكرة وقوفك ورا سِلِيمان

فاكرة الحَسرة وصوت البَحَّة ،

لما أذَعتوا إنُّه اتنحى

جاي دلوقتي تقول أنا ثوري (!!)

الناس مش هتقول غير ( أ - - ) 

...

67

شاف التابلت إسمه إينار

هايل وبأرخص أسعار

قابلُه البوب وقالُّه STOP

عُمر المصري ما يبقى التوب

سابو ، وجابو ، ومن إعجابُه ..

كسَّر عـ البوب اللابتوب

...

66

طول عُمري بحب الترويش

متعود عـالموضة أعيش

ألبس حظاظة في ايديَّا ..

أمشي هدومي واسعة عليا ..

وأساسي طبعاً دلوقتي

أشتم مرسي كل شوية

...

65

راح الأب وقال للإبن

إوعى تقول على حَد استبن

واوعى تقول عـ الثورة مؤامرة

أو عـ التغيير إنه مغامرة

أحسن يوم الإنتخابات

تيجي الناس وتقولك " حَمرا "

...

64

لو بتأيِّد زفت الطين

وبتكره وَرد الياسمين

مش محتاج تشتم وتزايد

أو تِخلَق للزفت فوايد

أصل الحل بكل بَسَاطة

إنك تعمل فيها مُحايد

...

63

الشعب المصري بقى عازم

يِكسر بعد العسكر قُلَّة

ويجيب رَيِّس، مدني لازم

شكراً للفنجري والمُلا

عوَّا ، برادعي ، مِنعم ، حازم

إنشالله الرَّيِّس زعبولا

...

62

إترشَّح مع إنُّه فلول

دايرتنا كِرهوه علطول

راح جَاب لحمة وجزَّار بارع

علشان تتوَزَّع في الشارع

قام الصُّبح لَقاها اتسرَقِت

ماتبَقَّاش غير كيلو " كوارع "

...

61

تِستَغفِلنا ؟ .. بيتهيَّألَك

لو فكَّرت فـ مصر بعقلك

هَتلاقي سِرها مكشوف

والخايِن دايماً معروف

لو فاهم غير كده عن مصر

يبقى انت اللي بجد خروف !!

...

مش هنتخبك يا فلول

مش هنتخبك يا فلول
وانا عـ الكلمة دي مسئول
إحنا امَّا عملنا الثورة
حرَّرنا قلوب وعقول
..
الأصوات ليك هَتقِل
عارفينك مش هَتحِل
الشعب هَيفضل صاحي
والفِل هيفضل فِل
..
لو جيتلي تاني البيت
بتوزَّع رُز وزيت
هَفتح اقولَّك متشكر
أنا يا حبيبي اتغديت
..
أنا عُمري ما هَبقى ناسيك
للظالم كُنت شريك
لمَّا احنا دُقنا المُر
كلتوها حمام بفريك
..
اللي اعتاد التزوير
وحَكَمنا بالجنازير
كَسَّرنا بعديه قُلَّة
ووراك هنكَسَّر زِير
..
وبتوب الثورة اتغطَّى
هتخِيل على مين دي يا بطة
الناس كلها عارفينك
لو حتى تكون زلبطة
..
أي خيانة لثورتنا
دي هتحصل على جثتنا
لو مستنينا ننام
جُوَّة التحرير فَرشِتنا
..
مصر بتتغير يابا
بعد ما حكموها عصابة
بقى فيها شجاعة وقوة
زي ما كان فيها طيابة
...
مش هنتخبك يا فلول