50

لو سَنَوات العُمر باعيدها

هارجَع تاني وهَطلُب إيدها

هيَّا اللي معاها الأوجاع

بتخِفّ وبتقوللي وَدَاع

شايِف عُمري فنجال شاي

" أسماء " حطِّتلُه النعناع

...

49

( اتنين ) حَبُّوا بإخلاص نية

واتمَنُّوا فـ عصر الحرية

إن بَلَدنا تكون بتقب

وعشان مَصر كمان بتحب

خطوبتهم كانت فـ "ابو زعبل"

وفرحهم في "الهايكستب"

...

48

قال مش شايِف أي فَساد

وَلا شايف فَقر بيزداد

ولا شايف للظُلم أمارة

ولا شايف للشعب خسارة ؛

بعدين قام مـ النوم مَفزوع ،

يصرخ ويقول : "النَّضَّارة" (!!)

...

47

الحُرية زَي الضوء

"والحاكم" شباك من فوق

لو مقفول، الضوء مَيجيش

ولا عُمر الحرية تعيش ؛

الحرية بتدخل بلدك ..

لما بتخلع منها "الشيش" (!!)

...

زواااجي :)

تحديــــــــــــــــــــــــــــــث:
واليوم السبت الموافق 11/7/2009 موعد الزفاف بإذن الله لأنتقل مع "أسمــــاء" أخيراً إلى بيتنا الجديد، نسألكم الدعاء يا أحبة

أَشرف وأعتز بأن أدعوكم إلى عقد زواجي على الآنسة أسماء عصام العريان، أو بالأدق (وكما فعلت هي) : أسماء عصام الدين محمد حسين العريان -صاحبة: هاعيش واتحدى أحزاني-؛ هي هدية أشكر ربي عليها..
وذلك بمشيئة الله يوم الجمعة الموافق 13-2-2009 بعد صلاة العصر بمسجد راغب بمدينة 6 أكتوبر،
وبإذن الله ستكونون على موعد مع آخر القصائد ومع نجوم تحبون رؤيتهم؛ أأمل رسم البسمة على وجوهكم وألا أُحرم -وأسماء- من صالح دعائكم

أخوكم: محمد أسامة رسلان أو محمد شمس الدين (الاتنين واحد ماتفرقش :))

ولا أنسى شكر واجب :
- لأخي وشقيقي المهندس عبد الرحمن على جهده في رسم خريطة مسجد راغب وأشك أن هيئة المساحة لو رأت عمله لأغلقت أبوابها :)
- لكل من هنأنا وبارك لنا هاتفياً أو على الفيس بوك أو على الملتقى أو بالمدونات، جزاكم الله عنَّا خيراً والعقبى عندكم جميعاً

خريطة مسجد راغب

46

مَصر برَغم اننا حَابِّينها

تاهت فـ قلوبنا وشَايفينها

فندق فِيه الشعب نَزيل

لكن فندق حالُه هَزِيل

وإدارتُه بتلهِي النُزَلاء

في الفَرحة بماتش البرازيل

...

45

مش " مُبارَك " أو " مُعَمَّر "

بَعدُه نهـتِف أو نزَمَّر

لَو مكَاتش العيِشة فُلَّة

بُكرة نكـسَر بعدُه " قُلَّة "

يِسوى لو إسمُه " الشَّريف "

أو إسمُه الرَّيِّس زعبولا

...

44

عَلَشان أمريكا تكون رَاضية

مَصر هتبقى شوارع فاضية

تِغلِب مِن نَضَافِتها " باريس "

وَلا فِيه توك توك وَلا أُتوبيس

علشان كلمة يقولها أوباما

قَفَلُوا من " الجيزة " لرمسيس (!!)

...

قصيدة: أنا والعزوبية

43

لو واحد نَافِق بجنون

مُمكن دَه نسمِّيه مجنون

لكن لو نَافِق فـ قضايا

بيبِيع فِيها فـ دَم ضحايا

يِبقى اسمُه عنبر مجانين

أو مُمكن يِتسَمَّى " سرايا "

...