18

قال هَتشرَّف لو نِتعرَّف

كُنت بَخَرَّف قُلت اتْعَرَّف

إدِّتُه إسمي عَند نافورة

والعنوان والسِّن وصُورة

فَات حَوَالَيَّه وعَدَّى المَيَّه

أتَارِيني بَكَلِّم عصفورة

...

17

كلمة ياشَعبي لوَجه الله

لَو نِفْسَك فعلاً فـ حَيَاة

حُطّ مَكَان الجُبْن بَسَالَة

وِاهْدَى وحَلِّل أَصل الحَالة

إزَّاي بَسّ تكون مَغسول

وبتِلعَب جُوَّة الغسَّالة !

...

...

الجبان

ابن الجبانة

كَل غدانا

قام لقانا

شعب طيب

كَل عشانا

...

...

الفاجومي

:)

16

لو ريِّسنا هوَّ قائدنا

ليه كارهينُه فـ كل مكان !

لو خير مَصرِنا جَيْ لولادنا

ليه بنلاقي شَباب غَلبان !

لو في حُريَّة فـ بَلَدنا

ليه بْيِسجنوا تاني "العريان" !

...

15

يامُبَارَك ياسَعَتّ القائد

ليه بْتِعشَق إسم السجَّان ؟

ليه مُلازِم أو حِتِّة رَائد

تدِّيلُه حَق الطُغيان ؟

ولَّا سْجونَك عَمَلِت فائض

قُلت اَمْلاها بالإخوان

...

14

راح يُخطُبْها عشان يِتجوِّز

رَدّ أبوها وهوَّ مْبوِّز

عايزين مَهْر وشَبْكة هديَّة

ومع الشَّقة ياريت عربيَّة

ولا هنأخَّر لِيها مُؤخَّر

قال شُكراً تَحيا العزوبية

...

13

لعبة كبيرة بَقَالها سنين

إتْلَعَبِت من غير قوانين

وخلاص فَارِت فِيها الفورة

وعنينا طلعت مش ( عورة )

وعرفنا إمكانياتنا

ليه هنخاف تاني من الكورة

...

12

فَسَّر فَسَّر فِـ الأحلام

خَلِّلي الناس تِحلم وتنام

تِحلم بالتِّركة المَوروثة

أو بجاموسة كَلِت بسبوسة

وِانْتَ تفسَّر ؛ وَانَا أتحسَّر

على واقِع أهل المحروسة

...

11

هُوَّ فساد حكامنا طوِّل ؟

ولَّا سكوتنا بَدَأ الأوِّل ؟

نَارهُم سَبَقِت في التوقيت ؟

ولَّا احنا كُنَّا الكبريت ؟

إحنا الفَرْخة ولَّا البيضة ؟

حَدّ يجاوِب يا كتاكيت

...

10

قال باتمنَّى أمُوتها شهيد

جينا نصلِّي استنَّى بعيد

قُلتِلُه مالَك قلبك تَاه

إخلِص لِلِّـ بتتمنَّاه

أبداً مش بِينُولها ياصاحبي

غير واحد موصول بالله

...

تصميم دعائي لشعر ظباط جيش

بناءً على رغبة القرايِِب والحبايِِب والنسايِِب والجِيران، واللي دقوا عـ البِبان ، فهذا بالأسفل تصميم لنشر ودعاية شعر ظباط جيش وهو مصمم ليوضع في الـ"سايد بار" للمدونات ويمكن ربطه برابط الملف الصوتي لشعر ظباط جيش مباشرةً أو بتدوينة شعر ظباط جيش وهي تحتوي على الملف الصوتي

ولِمن أراد حفظ الملف على جهازه يمكنه التحميل من هنـــا ولا يفوتني شكر كل من ساهم في نشره سواء من المدونين أو أصحاب المواقع جزاهم الله عنا خيراً كثيراً وعلى رأسهم الأخ أسامة النجم وموقع إخوان شرق ومدونة إنسى والأخ أشرف مالكي والأخ عمر علاء أبو العلا

وعلى الهامش : أنا مسافر إدعولي :)

9

حُكمَك ضد المدنيين

بيخالف تعاليم الدين

الحرية فـ دينَّا أساس

إلا الناس وحقوق الناس

الإسلام يا سعتِّ الريِّس

مش مُصحف بس بيتباس

...

8

البني آدم عُمرُه صغيَّر

ليه الْمنصِب دايماً بيغيَّر ؟

ليه الشَّعب الموعود بأمان

بقى متغيِّب جُوَّة لِيمان ؟

بقى بيغنِّي ليه "ظلموني"

أو يا زمان ارجع يا زمان ؟

...

7

مالِّلي وقالِّلي كلُّه كويِّس

ومفيش حَدّ احسن مـ الريِّس

بعدين بلِّم. قُلت اَتكلِّم

قُلتِلُه إصحى وصلِّي وسلِّم

إنت ياخونا؛ الأفيونة

وِقعِت مِنَّك حوش يا معلِّم

...

6

حيلِك يا وزيرة عُمَّالنا

اللي هيحصل دَه تهريج

كلِّمي ناس قالت أموالنا

واللي اعتصموا فـ غزل نسيج

هيَّ خلاص فِضْيِت أحوالنا

نِبعت مصريات لخليج !!

...

5

شُفتوا الشغل المِيَّة المِيَّة

تحت القبة وبالُّلكَمِـيَّـة

واللي تْزَايِد على أفكارُه

بكرة بيرجع ياخد تارُه

أما فـ بلدي بعون الله

المجلس سيِّد لقرارُه

...

4

حـالِم بالحرية حـالِم

جوَّة الحلم طلعت سلالِم

شُفت بلادي بنورها الصافي

مافيهاش ولا عاطل ولا حافي

كنت خلاص هحلم بالريِّس

قُمت صحيت مالقتش لحافي

...

3

اللي يأزأز لب براحتُــه

واللي يعارض إيه مصلحتُه ؟

المعارضة مش هتفيدنــا

والدستور دستورنا وسِيدنا

ليك الحق يا عمو نظيـف

بس ادِّينا شوية فـ إيدنا

...

2

قال بصراحة انا أحسن منكو

أحسن من ملايين فـ زمانكوا

مش شرير ولا كنت لئيم

ولا في بلادي كنت زعيم

واحسن ماكُل حق الناس

أقعد آكل في البرسيم

...

1

عايش والسلبية فـ دمُّه

عُمر ما حال الدولة يهمُّه

غير لو حس فـ بلده بنصر

مش أكاذيب معمولة فـ حصر

يومها هيفدي بلادُه بروحه

أو هيغني حبيبتي يا مصر

...

همَّ الإخوان ظباط جيش ؟

إزّاي واحد مدني يعيش

يحكم ضده ظابط جيش ؟

كان دَه سؤال بيدور فـ خيالي

عمّال ييجي كتير على بالي

بعد ما كُلُّه اتكلِّم فيه

بقى موضوع الوقت الحالي

قُلت لنفسي أي سؤال

ليه تفسير وحلول تتقال

الحلال هوَّ الحلال

بس يا نفسي تعالي نحِل

يِمكن نِلقى حقيقة تهل

لما نجيبها يمين وشمال

نَفسي قالتلي طب اسمع منِّي

هسأل وِانتَ تجاوِب عنِّي

وهفكَّرلك فيها بالراحة

والأسئلة هتكون بصراحة

وِانتَ تقُللي بقى التحليل

إزاي يعني فـ أرض النيل

المشهورة بالمواويل

اللي بتحكي عن ثقافتها

ولحضارتها عُمْر طويل

إزاي يسجنوا ناس أحرار

علشان دينهم رفعوا شعار

إزاي وجْيرانهم واخوانهم

قالوا عليهم ناس أبرار

واللي يعوزهم، بتميزهم

كانوا يساعدوا صغار وكبار

إزاي يبقوا دكاترة جامعة

يعتقلوهم ليل ونهار

ياخدوا فلوسهم. يمنعوا ناسهم

ولا حَدّ بيِبدي استنكار

إزاي وقضاءهم برَّأهم

ولا فيهم خاين غدَّار

إزاي علشان الإخوان

يبقى البطش قصاد أفكار

ولتأثيرهم يبقى مصيرهم

بايت جوَّة سجون العار

إزاي يحصل ده فـ بلدنا

أرض الأزهر أرض المدْنَى

اللي بنوها زمان أجدادنا

وبنتغنَّى بحريتها

ويغنوها كمان لولادنا

معقول دَه يكون فِـ الأوطان ؟

فيها الظلم بقى السرطان ؟

ولَّا بيحكم فيها شِيطان ؟

كِدبوا لما قالولنا أَخَدنا

منصب فـ حقوق الإنسان ؟

ولَّا العادلي ماهوَّاش عادلي

ولا يعرف للعدل مكان ؟

إزاي يبقى وزير لوزارة

أوزارها بتوْزِن بُلدان ؟

إزاي بيسيب التعذيب

والتعذيب أشكال والوان ؟

إزاي أهل الدين ساكتين

وسكوتهم ولِّد نسيان ؟

إزاي حتى البني آدمين

مش عارفين يعملوا عصيان ؟

هيَّ دِه فعلاً بتكون مصر ؟

فيها سجونها وفيها القصر ؟

ولّا عمينا وضحكوا علينا

ولَّا العُمر اتقصَّر قَصْر ؟

إزاي تبقى بلدنا دِه بس ؟

قُمت شاخط وبعِلْو الحس

كلمة زيادة ومش هاسمحلِك

أنا غلطان انّ انا بسمعلِك

بَسّ يا نفسي يا مُتَجنيَّة

ليه على بلدِك شايفِك جايَّة

دَنا أفديها بكل ماليَّة

وارفَع القُبَّعة لكلامها

أقصد أرفع يعني طاقِيَّة

كُلّ كلامِك مليان قُبْح

وانا شاكك فيكي من الصُبح

مرة تسِرِّي ومرة تنادي

مرة تخوضي فـ إسم بلادي

إسمعي مِنِّي بقى الكلمه دِه

إسم بلادي داهِنْها ببويا

وِابن ترابها يِبقى أخويا

عقلي مَنْسي بغِنوة نانسي

إن انا مصري كمان وأبويا

ماتعلِّمتيش حسن النية ؟

مافهمتيش معنى الوطنية ؟

ولا دُقتي طعم القومية ؟

ولا كَلتي الفول والطعمية ؟

ماغرستيش فـ أصالة بَلَدِك

ماوقفتيش فـ طابور جمعية ؟

إخص عليكي يا نفسي إخص

أثَّر فيكي زمن الرُخص

نَفسي قالتلي استنَّى عليَّا

إشتري منِّي شويّة شويّة

فين الغلط فـ اللي اتقال

كُل حكايتي سأَلت سؤال

مِش بَتسلَّى ولا بَتبلَّى

مالَك داخل فيَّا شمال ؟

قُلت لَإنِك مش فـ الصورة

والناس فـ سجون المعمورة

كلنا عارفينهم وِحشين

وكمان جماعتهم محظورة

نَفسي قالتلي عرفت منين ؟

أنا قُلتلها من الجرانين

من مقالات الصحفيين

اللي بيِكتبوا فـ "الأهرام"

وبيِمْلوا التقارير أرقام

ضد الناس المحظورين

وكأنها جَت من الداخلية

ليه مِش سامعة للناس دِيَّة ؟

نَفسي قالتلي من غير ليه

إنت يا بابا جرالَك إيه ؟

أهرام إيه اللي بتحكي عليه ؟

هوَّا القارِئ يعني جموسة

لمَّا يصدَّق أحمد موسى

ولَّا يصدَّق سمسم بيه ؟

دَ انا نِفسي أروح الأهرام

وادخُل على قِسم الإجرام

علشان اعلَّق يافطة كبيرة

أكتب فيها الكِدب حرام

قُلت ماهيَّاش آخر الكون

برضُه بشوف التليفزيون

قالِت طب ماتقُللِي الفُولَة

قُلتِلها فـ قناتنا الأولى

نَفسي قالِتلي يخرب بيتك

من برنامج البيت بيتك

اللي الريِّس أحسن ريِّس

كُلُّه كويِّس كُلُّه كويِّس

ومفيش أي وزير بيهيِّس

لو يحتاجهم مرة ضروري

يبقوا المخرَج لِيه من الزَنقة

فـ استغفالنا وسام جمهوري

وقُريِّب أوسكار في الخَنْقة

مش دَه اللي انتَ بتحكي عليه ؟

قُلت لنَفسي بَقُللِك إيه

معروف يعني انّ الإخوان

أُس البَلْوَى فـ كُل مكان

نَفسي قالِتلي عندك حق

وانا مِش ناوية أقُلَّك لأ

بس اشربلَك بُؤِّين شاي

وِانتَ تقُللِي افهمها ازاي

مِن أسوان للدلتا وسينا

إزاي همَّ سبب بلاوينا

عملُم لِينا البحر طحينة ؟

في البرنامج عَن مآسينا

قَعدوا يغنُّوا وصوروا لِينا

كُل مدينة جوَّة سفينة

والحرية هتِبقى المينا

والأموال راح تِكتر بِينا

وعرِفنا بعد الاستفتا

إن حامينا كان حرامينا

واللي قالولنا إحنا اخواتكوا

سِكنوا الشَّرم وراحوا مارينا

بعدين يِشتموا فـ اللي يعارض

ويزرُّوا فيهُم إسفينا ؟

قُللِي الإخوان عملُم إيه ؟

عملوا إيه في الناس أو فينا ؟

باعوا الأنفلونزا بشيك

قام بوباء مبعوت للديك

علشان يِبقى مرض فـ فراخ

أو فـ حمام معمول بفْرِيك ؟

ولَّا العار فـ الأسعار

اللي اترَفَعِت ليل ونهار

جُم رفعوها بالكواريك ؟

غيَّروا فـ نظام دَفع ضرايب

يبقى عجايب ويكون دايِب

كُل مواطن عندُه بوتيك ؟

عيُّوا الشعب وقالوا ميرسي

بعد ما دَخَلُوا بفيرس سي

خللُوا وباء السل وشيك ؟

ولَّا حبيبهُم لمَّا يسيبهُم

يِبقى عقابهُم عَند غضبهُم

يِِخلق مـ التلاكيك تلاكيك ؟

سرقوا مالنا ؟ قتلوا عيالنا ؟

فـ العبَّارة كانوا شْرِيك ؟

ولَّا باعولنا وجُم حطُّولنا

فـ الألبان بودرة سيراميك ؟

قُللِي الإخوان عملُم إيه ؟

وبيستاهلوا السجن عليه ؟

خانوا بلادهم بالمشاريع ؟

مع صُهيون عملوا التطبيع ؟

صدَّروا غاز والغاز بيضيع ؟

ولَّا بدون أسباب جُم حاصروا

حملة للمليون توقيع ؟

قُللِي ياخويا عملوا إيه

وبيستاهلوا الحظر عليه ؟

خللُوا نظام الطب خفيف

والمسقبل يِبقى مُخيف

قالوا الدور عَـ الدكتور

نِلغِيلُه سَنَة التكليف ؟

وَانا لا بَعَارض ولا بأيِّد

ولا جايَـ امثِّل بَبْني واشيِّد

ولا دَ كلام من عَندي بَقولُه

قالُه الدكتور حمدي السيِّد

قُللي الإخوان عملوا إيه

وبيستاهلوا المَنع عليه ؟

حَكَموا شعوبهُم زي عصابة ؟

جوَّة الغابة تدوس فـ غَلابَة

في الميزانية حكِّموا رَهْط ؟

ياخُد منها ويلهط لَهْط

ويعيش شعب بينقُر نَقْر

نُصُّه أسفل خَطّ الفَقْر

فيه رجَّالة بتعيش عالَة

وتعاني بالعجز بطالة

قالوا يا ريتنا بنون النسوة

بِندوَّر على لُقمة وكِسوة

وِان نتلاقَى فـ مصر بمِهنة

نِلقى جنيهنا مابقاش يِسوى

ويقُللك عوِّمنا جنيه

قُللي الإخوان عملوا إيه

وبيستاهلوا البطش عليه ؟

خربوا نظام البحث العلمي ؟

تبقى الخطة عِلمَك عِلمي

تِشبِه موقَف أحمد حلمي

إستروبيا وخلطة سوبيا

زي ما شُفتها يعني فـ حِلمي

أصل انا حِلمي بيِبقى حقيقة

شُفت العِلم فـ بلدي حريقة

أستاذ جامعة مش لاقي ياكُل

والناس بتخرَّجُه من ضِيقة

عالِم، عامِل بَحث تقيل

علشان يِخدِم أرض النيل

ساب الناس، يعمل أبحاث

واصِل كُل نهارُه بلِيل

وجَزَاة عِلمُه يشوف الويل.

لازِم تيجي وزارة تعايِن

واختِم خِتمَك دَه مش بايِن

وادفع تاني يجوز تِدَّايِن

وروتين يِقطَع منُّه الحيل

والتهزِيئ بَقى زي السيل

قال غلطان وحمار وبْديل

مانا لو عايِز أعرف قيمتي

هامشي واهاجِر زي زويل

وسلامنا لكل البلدان

عملوا إيه تاني الإخوان ؟

أنا زهقانة من التقطيم

مش هاتكلِّم عـ التعليم

على طالِب مصر المنحوس

اللي زمان كان زي الموس

مش هنفصَّل ولا هندوس

وكفاية اقللَك عِشنا وشُفنا

طُلاب جامعة بياخدوا دروس

قللي يا سيدي عملوا إيه ؟

ده نموذج لبلدنا فـ صورة

تتصوَّر بيه المعمورة

ماشية طريق مرصوف بخطورة

والقائد رجليه مكسورة

ومُساعدينُه بيلعبوا كورة

والركاب مَلُّوا من الفُرجة

واخِر ماتش كان اسمُه الشورى

واللي يفكَّر إنُّه يحذَّر

يبقوا دول الناس المحظورة

يقطعوا عنهم أكل العيش

وقاضيهم يحكم بشويش

جوَّة محاكم ويَّا عساكر

أصل الإخوان ظباط جيش

شر بليِّتنا اللي يضحَّك

واللي يسيب عيبُه ويتمحَّك

ولَّا سعتَّك رأيك إيه ؟

مالك يعني، ساكت ليه ؟

قُلت وعايزة أقُللِك إيه

عايزة أقول على نفسي عبيط

إني أسيب زيِّك بيزِيط

ويشرَّدلي ويعمل سِيط

ساكت يمكن تفهمي وِانتي

فاتحالي مُسجِّل تخبيط

أنا يا حبيبتي ورايا عيال

أبقى ازَّاي على سوء الحال

ولا على صفر المونديال

فكَّرت انِّي هريَّح بال

وِانِّي هقول لمراكب سيري

لما اتكلِّم ويَّا ضميري

بس يا نفسي ممكن اهون

واتشحطط فـ بلاد الكون

وفـ أحوالي هَكُون الدُّون

أنا مش ناوي أعيش مسجون

ولا هسمعلِك مهما يكون

والحكمة قديمة ومعروفة

اللي يكلِّم روحُه مجنون

نفسي قالتلِي كلمة أخيرة

كلمة واحدة ماهيش كبيرة

قالت نصرنا بِيك أو بيَّا

واوعى تفكَّر إنُّه وصية

واقفة عليك أو واقفة عليَّا

شُفت فـ جو العسكرية

رابطة أطفال الحرية

كانت بسمة فـ ليلنا الحالك

اللي أمينها أنس ابو مالك

طلعت من جنب السجَّان

فيها الحكمة وفيها بيان

شافُه الناس كل الأزمان

يفتكروها هتبقى نهاية

بس دِه بذرة كل بداية

بيها بيبدأ فجر جديد

جَيّ ينوَّر درب وليد

يتولِّد ويَّاه أجيال

تِفدي الدين بالروح والمال

مش هيهيبها إسم مبارك

ولا هتسمِّي ولادها جمال